ඔබ කොයිබද පවසන් සීගිරි ලන්දූ

සඳුන් අඳුන් තවරා මුව සරසන්නී
කොකුම් කල්ක නෙළුමෙන් ගත ඔප ලන්නී
රන්සිකිපිල සුවඳ දුමින් ගවසන්නී
දෙව් ලිය නුඹ කිම ඇසිපිය සොලවන්නී

මිහිරි වදන් තෙපුලෙන් සවනත පුරවා
සුරඟන රූ සපුවෙන් නෙත් සිත් නළවා
ජල උයනට යනවිට ඉඟසුඟ ලෙලවා
කොමල හසුන් යුවලය හිනැහී බැලුවා


කැට බිත පුරා නෙක වදනින් රස මැව්ව
නුඹෙ රුව පුරා අනුරා මල් පැන් සෙව්ව
කසුප් රජුගෙ රති හැඟුමන් සැතපෙව්ව
සුරලිය නුඹයි හැඩකළ සීගිරි පව්ව

ශීත මැදුරෙ උණුහුම රන්දා නිතිනි
රන්පට රිදී පට සළු දවටා ගතිනි
සව්බරණින් ලා සැරසී මදහසිනි
නුඹ විය එදා රජුනගෙ සීගිරි ‍රැජිනී

ගතසිත මෝහනය කර ආලෙන් බැන්දූ
නෙත්කලු සිනහ කැලුමන් දෙතොලග ‍රැන්දූ
මේඝ වලා, රන් වැටකේ සිරි කැන්දූ
ඔබ කොයිබද පවසන් සීගිරි ලන්දූ



^සූ (2011.12.24 .... 2.24 a.m.)